“O monte arde porque dá cartos”. Conversa cos traballadores do lume

O lume está a ser o violento protagonista un ano máis do verán galego. A praga dos incendios forestais é unha catástrofe de incalculables dimensións para o País, de múltiples e difusas causas e, sobre todo, un problema case imposible de resolver para o común da cidadanía, que mesturamos certezas con rumores para tratar de atopar unha explicación ao inexplicable.

A semana pasada foi nefasta para os montes da nosa comarca, chegando a rexistrarse lumes en parroquias de Cuntis, Moraña e Caldas. Temos tamén o caso do Monte Xiabre, que leva rexistrados cinco lumes no que vai de verán. Falamos con quen mellor pode atinar na análise e na diagnose: os traballadores profesionais. Falamos con Xosé Arca (en twitter: @arxons), veciño de Cuntis e axente forestal, e con David Iglesias (en twitter: @sondomorrazo), veciño de Marín e brigadista da helitransportada. Nas primeiras palabras da conversa xa confirman que a pista que debemos seguir para atopar as causas é, unha vez máis, a dos cartos: “O monte arde porque dá cartos“. A quen? Por que? e a prevención? e os medios? e a planificación territorial? e os políticos? e os gobernos? e os ruxe-ruxe espiñentos? e a presenza da UME? Desenvolven todas estas cuestións e algunha máis falando moi claro e con precisión. Unha conversa que non ten desperdicio e con claro valor pedagóxico, da que se poden aprender moitas claves e desenganarnos dalgúns mitos.